alfabetoz

—

diskoak

«HI BIZI HADI»
URGABE
TRIKI ELKAR, 2002

URA

Uraren presioaren indarrak

eraman izan balu bezala,

eraman dute hura ere

batek dakien toki ilunetara.

Noraezean gabiltza kalez kale

helduko ez den azalpen baten zain,

eta inoiz helduz gero ere

ez gara izango sinisteko gai,

zeren eta berriz, euria hasi da.

Lasterka goaz ihes egiten

burua non babestu jakin gabe,

eta jakinez gero ere

bertan sartuko ez bagina hobe.

Teilatupean gaude

urak busti ez gaitzan,

zu non ote zaude?

Galdetzen dugu gure baitan.

Non zaude? Non gaude?

Zergatiaren erantzunak hargatiak ote?

Azkenean gu ere busti gaituzte

haien ur gazi zikinarekin,

bagaramatzate blai eginda

inoiz ere ez sikatzeko ustearekin.

Musika eta hitzak: Ainara Arrizabalaga