Hasierako orrialdeaBideoakDoinutegiaArgazkiakPrentsaEuskal Herriko Trikitixa Elkartea

 

TRIKITI TESTUAK

alfabetoz

diskoak

OROIMENAK

«SOINU ETA KANTU»
KAXIANO
ELKAR, 1996

 

Oroimen polit askoak

baditut aspaldikoak

kontatzeko modukoak

ezertxo ere erantsi gabe

neronek bizitakoak

jakin ditzaten gaurkoak

idatzi ditut bertsoak

sinistu esandakoak.

 

Gure Euskal Herrietan

orduko baserrietan

ez dut esan nahi denetan

baina sei, zortzi, hamar, hamabi

ume sendi gehienetan

zaharrak etxeko lanetan

gazteak lantokietan

txikiak ikasketetan.

 

Goizean garaiz kalera

herri-eskola batera

erdaraz hitzegitera

sartu orduko "Buenos días" ta

"Cara al sol" kantatzera

lehioan beti bandera

eta espainola gainera

han egin nuen karrera.

 

Maixu denak erdaldunak

tokatu zitzaizkigunak

gorrotatzen euskaldunak

bildurra ere ematen zuten

haien kopeta ilunak

ez ziren bihotz bigunak

orduko bigotedunak

nik ez nituen lagunak.

 

Erdaraz hitzik jakin ez

ezer ulertu ezinez

etxera buruko minez

gure eskola hola joan zenez

piper batzuk eginez

apaizak ase dotrinez

mezetan berriz latinez

aspertu nintzen mitinez.

 

Beste saio bat etxian

eskolatik itzultzian

su ondoan iluntzian

amonarekin oraziuak

eta nolako garrantzian

harek bai pazientzian

erakutsi otoitzian

eta euskara hutsian.